Duha ka nominado ang ituboy nila ni Gwen ug Tomas sa MCWD

Aron malikayan ang kasamok nagkasinabot sila si mayor Tomas Osmeña ug gobernador Gwendolyn Garcia pag-endosar og duha ka common candidate alang sa pagkasakop sa board sa Metro Cebu Water District (MCWD).

Nasayran nga kagahapong adlawa maoy deadline sa pag-endosar og mga kandidato sa mohulip nila ni Atty. Rico Tautho ug Ruben dela Cerna human mapupos ang ilang appointment isip MCWD board sa petsa 31 karong bulana.

Atol sa press conference kagahapon sa udto gibutyag ni mayor Osmeña nga si Atty. Adelino Sitoy og Engr. Leo Pacaña maoy gikasabutan nila sa gobernador nga itudlong hulip sa MCWD board.

Si Sitoy maoy gihulip kang Atty. Chito Teleron nga maoy unang nominado alang sa maong posisyon apan napugos sila si Osmeña ug Garcia paghulip niini human namatay ang maong opisyal.

Gipasabot sa mayor nga gikasabutan nila sa gobernador ang komposisyon sa usa ka manlalaban og batid nga engineer nga mohulip sa board sa MCWD aron makatabang kini sa pagpalambo sa operasyon sa maong buhatan.

Una nang nitumaw ang panagbangi tali nila ni Osmeña og Garcia sa isyu kon si kinsa kanila ang adunay katungod nga motudlo og sakop sa board sa MCWD.

Apan gibutyag sa mayor nga nasulbad na nila sa gobernador ang maong problema og gipasanginlan niya ang P.R. man sa Ayala Estateland Consortium nga maoy nagmugna og isyu aron maguba ang maayong relasyon nila tali sa gobernador.