Lalaki naaktuhang nanglili sa asawa sa iyang silingan

Usa ka 35-anyos nga lalaki ang nasikop sa bana sa ilang silingan nga iyang gilili niadtong Biyernes sa gabii diha sa dalan Deiparine, Barangay Tabunok dakbayan sa Talisay.

Ang nasikop mao si Reynaldo Mali, minyo kinsa gikatahong mogamitay og ginadiling drugas nagpuyo diha sa likod nga bahin sa compound nga gipuy-an sa biktima.

Ang biktima mao si Nancy Salcedo 30, residente sa nahisgutang lugar.

Si PO1 Achilles Alisen polis sa Talisay nagkanayon kagahapon sa Banat News nga atol nga naglaba si Salcedo dihang nahitabo ang insidente.

Ang likod sa pader nga semento sa compound nga gipuy-an ni Salcedo gikatahong gituyoan og lungag diin maayo kaayong pagpanglili ni Mali sa biktima.

Apan wala damha ni Mali nga naniid diay ang bana ni Salcedo og nasignit ang suspetsado dayon gitugyan sa grupo sa alert team sa kapolisan sa siyudad.

Matud ni Alisen nga si Salcedo mibahad nga mopasaka og kaso batok ni Mali.

Si Mali temporaryo karong natingkagol diha sa Talisay police detention cell.