Operasyon sa BOC sa Asean summit normal lang - Boysie

Normal lang gihapon ang operasyon sa buhatan sa Bureau of Customs Port of Cebu atol sa Asean summit karong sunod semana.

Si Cebu Customs District Collector Ricardo "Boysie" Belmonte nagkanayon nga sukwahi sa milabay'ng lakang sa maong buhatan nga gabii lamang mopagawas sa mga kargamento sa CIP nunot sa pagsirado sa mga karsada nga agian sa mga delegado atol sa maong summit, adunay mahitabong pagpagawas sa mga kargamento bisan panahon sa adlaw.

Sumala pa ni Belmonte nga kinahanglang normal ang operasyon sa adwana bisan panahon sa Asean summit tungod kay adunay daghang mangabot nga mga kargamento.

Dugang pa ni Belmonte nga nakadawat siya og kopya sa schedule sa pagtak-op sa ceremonial route gikan ni Police Regional Office - 7 Director Silverio Alarcio Jr. ug kini maoy iyang himuong basehanan sa paghatag og clearance sa mga kargamento nga igawas sa Cebu International Port.

Normal usab ang pagpagawas sa mga kargamento nga alang ngadto padulong sa amihanan gumikan kay wala kini maapil sa ceremonial route o sa secondary route sa Asean summit bisan sa mga regular nga oras.

Si Edgar Galeos, hepe sa Port Operations Division sa Port of Cebu nagkanayon nga dili mahimong ikompormiso ang mga kargamento ilabi na ang mga raw materials alang sa mga pabrika sa Mactan Export Processing Zone.

Matud ni Galeos nga himuon nila kutob sa ilang mahimo aron lang dili masakripisyo ang operasyon sa mga pabrika alang sa export nga giisip nga dakong tabang sa ekonomiya dinhi.

Kahinumduman nga nagkaproblema ang BOC sa mga kargamento sa mga importers ug exporters nga ipagawas sa CIP gumikan kay malangay kini sa higayon nga matanggong kini tungod sa pagtak-op sa Asean summit, diin ang ceremonial ug primary route gikan sa dakbayan sa Lapulapu hangtod na sa Sugbo pagatak-opan kini sa mga otoridad.

Gumikan sa maong kalambuan, si Belmonte mapasalamaton sa maong sitwasyon gumikan kay padayon ang ilang paningkamot aron nga makuha ang target collection karong tuiga nga mokabat sa P5.2 bilyones.