Magtiayon giunay tigbas sa amahan

Magtiayon nakaangkon og mga samad tinigbasan sa ilang mga lawas human sila unaya sa pagtigbas sa ilang amahan gamit ang sanggot niadtong Biyernes sa gabii diha sa Barangay Sohoton lungsod sa Badian.

Ang mga biktima giila sa mga polis sa Badian nga si Lucrito ug Cirila Dohinog, parehong 39-anyos mga residente sa nahisgutang lugar daling gidala diha sa Barili district hospital.

Ang suspetsado mao si German Amorado 59-anyos amahan ni Cirila nagpuyo usab diha sa lugar nadetiner karon sa Barili police detention cell.

Base sa imbesitgasyon sa mga polis nga miresponde pinangulohan ni SPO3 Rufino Tabañag nga ang magtiayon atol nanihapon dihang nahitabo ang insidente

Kalit lang nga misulod sa ilang balay si Amorado og sa walay igong rason nanigbas kini.

Si PO3 Ronald Elcana polis sa Badian mibutyag nga giangkon ni Amorado nga hubog siya og wala kini makahibawo sa iyang gibuhat.

Matud ni Elcana nga wala siya'y nakuhang motibo sa maong insidente dihang gisukit-sukit niya si Amorado ug lakip usab ang mga biktima nagdumili sa pagbutyag sa motibo sa maong insidente apan mibahad kini nga mopasaka og kaso batok sa ilang amahan.