P2.2 milyones ang gahin sa building sa Parian police station

Ang kagamhanan sa dakbayan sa Sugbo mopatukod og police station diha sa barangay Parian, kinsa sa pagka karon niukopar lang sa gamay'ng bahin sa building nga iya sa barangay Parian.

Atol sa sesyon sa konseho sa dakbayan kagahapon, giaprobahan sa mga konsehal ang maong proyekto alang sa usa ka andana nga building nga himuong buhatan sa station 1 sa Parian.

Ang Parian police station maoy usa sa mga police stations dinhi sa dakbayan nga nag-ukopar lang sa building nga dili gyod ila.

Ang ubang police stations mao ang Punta Princesa police station ug Mambaling police station. Ang mga police stations sa maong duha ka dapit nagpahiluna sa silong nga bahin sa barangay hall sa maong mga barangay.

Ubos sa program of works and estimates alang sa pagtukorong building sa Parian police station, ang maong usa ka andana nga building mogasto og kapin sa P2.2 milyones.

Ang Parian police station maoy giila nga station-1 sa Cebu City Police Office (CCPO) nga kaniadto didto nagbase sa T. Padilla public market apan human sila papahawaa didto, mibalhin na usab sila sa Parian.