Christmas lights na-short maoy hinungdan sa sunog

Hapit maugdaw sa sunog tungod sa short circuit sa series lights niadtong Martes sa gabii ang buhatan sa tag-iya sa South Central Market diha sa Lawaan III, Talisay.

Mikabat sa P100 mil ang danyos sa maong sunog diin nalakip niini ang mga ekipo sa buhatan ni Mateo Velasco, hingkod ang panuigon. Apan walay gikataho nga naangol sa insidente.

Base sa imbestigasyon ni Senior Fire Officer 2 Emilio Abellana nga na-short circuit ang wire sa gidayan-dayan nga series lights diha sa buhatan ni Velasco ug dali kaayong mikuyanap ang kalayo.

Si Myrna Villamor, business manager sa Manila Food Restaurant nga nahimutang diha sa lugar maoy daling nanawag og bombero.

Ang maong sunog gipaubos sa unang alarma ug nakontrolar ang kalayo mga 30 segundos gikan sa pagkadawat sa mga bombero sa alarma mga 8:55 sa gabii.