Nahitabo ang aksidente sa dalan M.C. Briones sa Tipolo, Mandaue alas 5 pasado ang takna kagahapon sa buntag.
Ang namatay mao si Jeffrey Catampo, 33, minyo ug nagtrabaho isip tire man sa vulcanizing shop nga nahimutang usab sa nahisgotang dapit.
Si SPO2 Ruben Cendana sa Traffic Section sa Mandaue City Police Office maoy nag-ila sa namatay dihang gikahinabi sa Banat News human sa maong hitabo.
Samtang ang anaa sa kritikal nga kahimtang mao si Rodulfo Sasing, 47, minyo nga Consolacion kinsa nakabaton og dakong kadaot sa ulo ug nabalibali pa ang kabukogan sa iyang kalawasan.
Dugang pa ni SPO2 Cendana nga si Sasing maoy kauban sa lain pang pito ka pasahero sa minibus nga gimaneho ni Rick Toledo, 23, nga lumolupyo sa Consolacion.
Matud pa niya nga ang pito ka mga biktima nalandig usab sa tambalanan apan nakagawas lamang usab sanglit dili man grabe ang ilang pagkaangol.
Miingon si Cendana nga gikan sa Consolacion ang mini bus dihang paghidangat sa maong dapit kalit lang nalimbuwad dihang gilikayan ang mi-U-turn nga multicab nga gimaneho ni Leodegario Sabudo nga taga Cordova, Cebu.