Balay sa civil engineer sa Barili, gikawatan

Mga sakop sa akyat-bahay gang mihasi karon sa Barili ug ang panimalay sa civil engineer maoy usa sa mga biktima kinsa nakuhaan og dakong kantidad nga salapi, mga mahalon nga cellphone ug ang choppy nga motorsiklo niini maoy gigamit sa pagsibat pahilayo.

Ang biktima mao si Engineer Victor Guzman, hingkod ang panuigon, minyo ug nagpuyo sa barangay Poblacion sa nahisgotang lungsod.

Si PO3 Zaldy Aurillo sa kapolisan sa maong lungsod nga gikahinabi sa Banat News miingon nga nahinanok og katulog ang biktima uban sa iyang asawa ug tulo niini ka mga anak.

Ang pundok sa wala hiilhing mga kawatan nakasulod sa panimalay pinaagi sa pag-abli sa kandado sa pultahan gamit ang master key.

Si PO3 Aurillo miingon nga nautingkay ang mga butang sa sulod sa lawak sa panimalay sa biktima ug gikuha ang salapi nga gisulod sa cabinet.

Matud pa niya nga ang tulo ka unit nga may kamera nga cellphone nga gitongtong sa ibabaw sa cabinet ang lakip usab sa gikawat.

Dugang pa ni PO3 Aurillo nga sa pagsibat sa mga kawatan ang motorsiklo sa biktima nga gi-parking sa gawas sa garahian ang lakip usab unta sa gikawat.

Apan nahutdan kini sa gasolina ug giabandonar kini sa barangay Tubod may gilay-ong siyam ka kilometro gikan sa barangay Poblacion sa maong lungsod.