Babaye miambak sa atabay, patay

Usa ka babaye nagpakamatay pinaagi sa pag-ambak sa atabay nga gibanabanang 23 ka dupa ang giladmon duol sa ilang gipuy-an sa Carcar.

Nahitabo kini alas 8:15 sa buntag sa miaging adlaw sa Sitio Tindahan, Canasojan, Carcar.

Segun sa report sa kapolisan ang naghikog gihilantan bali'g usa ka semana ug bag-ohay pa lang naayo ug giingong may depekto nang daan ang panghunahuna niini.

Ang naghikog ug namatay mao si Emma Lantaya, 30, nga kasamtangang nagpuyo sa nahisgutang lugar ug lumad nga taga Malabuyoc, Cebu.

Sila si SPO1 Joel Pananganan ug SPO1 Norman Lapeña ug ang mga sakop sa Carcar Emergency Action Group (CEAG) daling miadto sa maong dapit aron pagluwas ni Lantaya.

Sa gihimong imbestigasyon ni SPO1 Pananganan gikan sa kapuyo niining si Alfredo Formentera nga usa ka traysikad driver nasayran nga ang naghikog hapit na duha ka buwan nga nabantayan nga naapektuhan ang panghunahuna.

Matud ni SPO1 Pananganan nga nahinabi sa Banat News si Lantaya pasado alas 4 sa kaadlawon migawas kini ug wala mahibaw-i sa iyang kapuyo.

Sumala pa niya dakong kahikurat ni Formentera sa dihang gipahibalo nalang sa silingan nga ang iyang kapuyo niambak sa atabay.

Nagkanayon si Pananganan usa sa mga silingan nga nagkuha og tubig nianang buntag nahibulong dihang kalit lang nalubog ang tubig sa atabay.

Dako pa unta ang kahigayonan nga mabuhi si Lantaya kinsa nakakupot sa pisi sa timba apan mibalik kini og ambak paingon sa ubos.

Mokabat sa upat ka oras una pa nakuha ang lawas apan patay na kini.