Rosas mopasakag libelo sa namasangil

Si Bureau of Immigration and Deportation (BID-7) Regional Director Geronimo Rosas mopasaka og kasong libelo ngadto sa mga tawo nga namasangil kaniyang nangilkil og P200 mil bugti sa pagpasulod sa duha ka mga Chinese nationals sa Mactan Cebu International Airport sa milabay'ng semana.

Matud pa ni Atty. Kit Enriquez, Atty. Vicente Fernandez ug Atty. Brandon Enad, mga abogado ni Rosas, nga malisyoso ang gihimo sa mga reklamante ug kinahanglan nga kahatagan og hustisya si Rosas sa mga alegasyon batok kaniya nga gihulagway nga walay kamatuoran.

Matud pa ni Enriquez daghan siya og nakitang sayop sa pagpasaka og kaso ni George Tan nga ginotaryohan sa abogado niini nga si Atty. Pedro Leslie Salva.

Sumala pa ni Enriquez base sa dokumento, ang covering letter nga gihimo ni Salva nag-una diin gihimo kini niadtong Nobiyembre 17, 2006 kay sa affidavit complaint nga giluwatan ni Tan ug sa iyang mga testigos nga sila si Gabriel Andujar ug Reginald Cabigas diin giluwatan kini niadtong Nobiyembre 18, 2006.

Lakip sa nasayran ni Enriquez gikan ni Rosas nga wala pa masang-at ang maong reklamo sa Visayas Ombudsman apan gipakatap na kini ngadto sa mga sakop sa media hinungdan nga nakahatag kini og dakong kaulawan kang Rosas, sa iyang pamilya nga nakabasa sa kaulohan ug sa buhatan sa imigrasyon.

Si Rosas, pinaagi sa iyang mga abogado, nangandam sa pagpasaka og kaso sa mga reklamante ug ang mga saksi niini lakip na ang mga reporters nga nagsuwat sa mga pamantalaan, editors ug ang publishers niini.

Kahinumduman nga duha ka mga Chinese nationals nga si Deng Minwei ug Cai Zhouzhi miabot sa MCIA niadtong Nobiyembre 13, 2006 luwan sa Cathay Pacific Airways diin gipabalik sa ilang nasud human nga kini giluwatan og exclusion order gumikan kay walay klarong adress nga pagaadtuan niini ug gideklarar nga usa ka 'public charge.'

Nagduda si Rosas nga adunay nagpaluyo sa pamasangil nga nangayo siya og P200 mil bugti sa pagpasulod sa duha ka Intsik.