Si Ferdinan Roflo alyas "Tisoy," 18, dunay kapuyo ug taga Hipodromo, mituyo ug adto sa Barangay Hall sa Carreta San Miguel aron mosurender apan gimanduan nga paderetsohon og surender ngadto sa CIDG-7.
Si Roflo maoy gitumbok sa duha ka minor de edad nga midunggab patay ni Junmar Bolabola, 22, residente sa Lower Carreta niadtong Lunes ug nakahukom nga mosurender human makadungog nga gustong mobawos kaniya ang paryente sa iyang napatay.
Sa gihimong pakighinabi ni Roflo sa Banat News kagahapon sulod sa detention cell sa CIDG-7 siya miingon nga usa lang ka disgrasya ang nahitabo.
Iyang giangkon nga suod kaayo sila nga higala apan nagsugod ang ilang panagbikil sa usa lang ka komedya hangtod nga nagdumot kaniya ang biktima.
Matud niya nga niadtong Biyernes sa hapon nagtupad sila og paghigda sa iyang kapuyo nga si Jessel Sarimogan sulod sa panimalay ug kalit lang misulod ang biktima dayong dunggab kaniya ug sa iyang kapuyo. Si Roflo nasamdan sa iyang walang bukton, samtang si Sarimogan nasamdan sa iyang wala nga paa.
Dugang pa niya niadtong Lunes nag-abot sila sulod sa menteryo ug gikalitan na usab siya og dunggab. Misuway siya og ilog sa kutsilyo hangtod nga iyang nakuha ug gidunggab sa makadaghang higayon.
Ang biktima nga si Bolabola nakaangkon og pito ka samad sa kalawasan gani nagtaop pa ang kutsilyo sa lawas nga iyang gibayaan.