Pari nga nanghinol ipaila sa Oasis

Nagkahiusa karon ang simbahan ug ang Department sa Edukasyon alang sa imbestigasyon kalabot sa giingong usa ka pari nga nanghinol og bra sa mga estudyanteng babaye sa Abellana National School (ANS) samtang nagpakumpisal.

Si Msgr. Achilles Dakay, tigpamaba sa Artsidyosesis sa Sugbo nagkanayon nga dili sila makapahamtang og silot sa usa ka pari dihadiha nga dili ipasubay sa "due process" ang iyang kaso.

Apan matud pa ni Dakay nga kinahanglang tugkaron una ang kinauyokan ning maong kaso pinaagi sa nagpasiugda sa kalihukan sa mga estudyante niadtong Lunes Nobiyembre 13 sa ANS, nga nagpahigayon sa Life in the Spirit Seminar nga gipasiugdahan sa Oasis of Love.

Ingon usab niini ang lakang nga gihimo ni Regional Director Carolino Mordeno sa Department of Education (DepEd-7) nga nagmando sa taga Oasis of Love pag-ila sa paring hingtungdan.

Matud pa ni Mordeno nga lisod kondinahon nila ang giingong pari nga nanghinol sa mga bra sa 20 ka mga dalagitang estudyante sa ANS kun dili sila makaila niini.