Briton napalgang patay

Usa ka 64 anyos nga Briton napalgang patay sulod sa giabangang lawak diha sa Qyda, barangay Quiot ning dakbayan sa iyang kapuyo niadtong milabay'ng gabii.

Ang biktima giilang si Peter John Madden, usa ka pensioner ug temporaryong nagpuyo sa maong dapit uban ang iyang kapuyong si Annie Laput,47.

Sa imbestigasyon ni SPO3 Zenaido Pastorfide sa Homicide Section base sa gitug-an ni Laput nga nianang pagkahapon palang mimando kaniya si Madden aron papangitaon og paabangang balay tungod kay dili siya komportable sa kasamtangang gipuy-an.

Nianang mibalik na si Laput gikan pagpangita og balay nakit-an nalang niya ang biktima nga naghapa diha sa salog sa lawak hinungdan nga nagpatabang siya sa mga silingan aron masaka kini sa higdaanan.

Dihang ilang gipukaw, wala na kini motubag hinungdan nga ilang gipahibalo ang kapolisan sa hitabo.

Walay nakitang mga dokumentos ang kapolisan diha sa lawak sa biktima aron magpamatuod nga kini usa ka Briton, si Laput mitug-an nga dili palang dugay nabiktima si Madden og mga kawatan diin nadala ang iyang mga importanteng dokumentos ug mga butang.

Usa ka botelya sa brandy, usa ka botelya sa pain reliever ug usa ka botelya sa food supplement maoy nakita diha sa crime scene. Sumala pa sa mga polis walay timailhang dunay kagubot ang nahitabo diha sa sulod ug walay nakitang mga bun-og ug samad sa kalawasan ang biktima.

Gikatakdang ipa-awtopsiya pa ang patay'ng lawas niini aron matino kung unsay hinungdan sa kamatayon niini.