Si Chief Inspector Fermin Armendares III, sa Criminal Investigation and Detection Team mitug-an sa Banat News nga dili pa nila mapasaka ang kasong robbery-extortion batok nila ni Roberto Juanico ug Ruperto Navasca.
Sumala pang Armendares nakadawat sila'g tawag sa telepono gikan sa nagpailang "Noreen" ug misumbong kabahin sa duha ka tawong nagpailang mga sakop sa CIDG7 ug mibabag sa ilang trak nga may kargang bugas.
Si Armendares kinsa nasayod nga way operasyon sa maong lugar niadtong tungora misusi sa Mantuyong diin ilang nakita sila si Juanico ug Navasca diha sa may motorsiklo tupad sa usa ka trak nga may kargang bugas.
Dihang sila si Armendares mipailang mga sakop sa CIDG ang duha gikatahong mitug-an nga mga sakop sila sa Maritime police ug si Navasca nagpailang siya si "Major Cebosa," dihang gipangitaan og ID gipakita nilang mga sakop sila sa Coastal Barangay Information Net sa 701st Maritime Police nga nagbase sa Ouano Wharf.
Usa ka lisensyadong kalibre .45 pistola ang nasakmit gikan kang Navasca nga may unom ka buhing bala samtang lisensyadong High-Cap Super .38 pistol nga may 10 ka buhing bala usab ang nakuha kang Juanico sa CIDG7 apan walay napakitang legal nga papeles sa pagdala niini gawas sa ilang balay hinungdan sa ilang pagkaaresto.
Nakuhaan usab og laing ID si Navasca isip sakop sa MIG-7 agent apan wala siya'y mission order samtang si Juanico mipakita usab og ID sa media.
Matud pang Armendares wala mopakita ang complainant diha sa ilang buhatan kagahapon hinungdan nga kasong paghupot lang una sa armas ang gipasaka nila kagahapon.
"Dili nato maapil ang robbery-extortion kay wala man mopakita ang complainant, di sad nato maapil ang usurpation kay ma-carry naman sa illegal possession of firearms," asoy pang Armendares.
Samtang si Atty. Manuel Monson ang abogado sa duha mitug-an sa mga sakop sa media nga usa lang ka gamay'ng wala pagkasinabtanay ang insidente, ang duha matud pa ni Monson nga dunay dakong dedikasyon sa ilang trabaho maong ilang gipara ang maong trak, apan wala na mokomento si Monson kabahin sa rason sa pagpahunong sa duha sa maong trak sanglit wala pa sila magkaestoryahay sa iyang mga kliyente.
Si Mayor Thadeo Ouano daan ng namahayag nga aktibo sa kampanya batok illegal nga drogas ang duha diha sa iyang dakbayan, gani si Juanico maoy consultant sa dakbayan sa anti-illegal drugs campaign.
Daan ng mipasalig si Ouano nga tabangan ang duha sa maong kaso sanglit dili mga ekstorsyonista ang duha.