Mag-uuma gipatay gawas sa iyang balay

Patay ang usa ka mag-uuma sa barangay Bulwang, lungsod sa Tuburan human mabiktima sa pagpamusil sa wala pa hiilhing mamumuno niadtong miaging gabii.

Ang biktima mao si Rene Arnejo, hingkod ang panuigon, minyo, nga nagpuyo sa maong dapit.

Si PO2 Rustie Ong sa kapolisan sa maong lungsod maong nag-ila niini dihang gikahinabi sa Banat News kagahapon.

Matud pa niya nga ang barangay tanod sa maong dapit nga si Alfredo Villafranca mao unang nakapadangat og taho niining ngadto kanila.

Si Miame Arnejo, hingkod ang panuigon ug asawa sa biktima misugilon nga sa sulod na sila sa ilang panimalay dihang ilang nabati ang pagsampit sa wala hiilhing lalaki.

Dugang pa niini migawas ang biktima ug nakadungog na lang siya og boto sa armas nga nakaaghat kaniya sa pagsunod og gawas aron mosusi.

Iyang nakita ang iyang bana nga nagbuy-od na sa yuta nga naligo sa kaugalingong dugo ug patay na.