Sapa sa Tap-tap ug Tabunan himuong tourist destination

Planong i-develop sa kagamhanan sa siyudad sa Sugbo ngadto sa usa ka tourist destination ang usa ka sapa nga nahimutang sa boundary sa bukirang mga barangay sa dakbayan sa Tap-tap ug Tabunan.

Gipahibalo ni Mayor Tomas Osmeña atol sa press conference kagahapon sa udto nga padayon na sila karong nagsabotsabot sa mga opisyal sa nasud sa Italy nga nipadayag og interes nga maoy mogasto sa himuong pag-develop sa maong lugar.

Kini human si Konsehal Gabriel Leyson mipasalig sa pag-donar sa maong luna nga maoy nahimutangan karon sa maong sapa diha sa bukirang bahin sa dakbayan.

Gitug-an sa mayor nga dugay nang mga katuigan siyang nagplano pag-develop sa maong sapa nga himuong picnic ground dinhi sa dakbayan apan wala dayon kini mapatuman tungod sa kakulang sa gahin nga gikinahanglan niini.

Karon nga mipasalig na ang kagamhanan sa Italy nga moabag sa pag-develop niini desidido na si Osmeña nga ipatuman ang mao niyang mga plano.

Apil sa plano ang pagbutang og dalan sa maong dapit aron direkta nang makalahos ang mga lokal ug langyaw'ng turista nga gustong mangaligo ug magpabugnaw sa maong lugar.

Matud ni Osmeña apil sa makapahimulos sa mao unyang improvement mao ang lungsod sa Balamban gumikan kay moabot man sa Mount Manunggal ang himuong pag-develop niini nga nasakop na sa Balamban.

Matud ni Osmeña numero-unong makabintaha unya niini mao ang mga molupyo dinhi sa dakbayan nga gustong maglingaw-lingaw ilabi na panahon sa mga adlaw'ng Sabado ug Domingo.