Birhen sa Regla sa Lapu himuong national shrine

Ang simbahan sa Birhen sa Regla sa dakbayan sa Lapulapu nga natukod niadtong 18th Century gikatakda na nga ideklarar nga National Shrine karong Enero sa sunod tuig.

Kini ang gipadayag ni Msgr. Cristobal Garcia atol sa misa nga gihimo sa barangay Marigondon niadtong miaging Sabado sa buntag.

Ang misa nga gihimo sa barangay Marigondon maoy kabahin sa pagsaulog sa tinuig nga pangilin sa milagrosang patron sa dakbayan karong Nobiyembre 20 ug 21 niining tuiga.

Ang pagbukas sa mga kalihokan sa tinuig niining pangilin natigayon pinaagi sa gipasiugdahang fluvial procession sa kadagatan sa Mactan Channel.

Si Msgr. Garcia kinsa maoy chairman sa Cebu Archdiocesan Commission sa iyang pamahayag miingon nga ang Catholic Bishop Conference of the Philippines (CBCP) maoy mohimo niini sa deklarasyon.

Ang pagdeklarar niini pagahimoon atol sa CBCP meeting karong Enero 2007 human usab sa pagtuki sa aplikasyon nga giduso sa archdiocesan sa Sugbo.

Sa nasayran nga ang gikatakdang deklarasyon sa maong simbahan karong Enero sa sunod tuig maisip nga dugang kining National Shrine sa mga simbahang Katoliko dinhi sa Sugbo.

Naglakip sa mga simbahan nga gideklarar sa CBCP nga National Shrine mao ang simbahan sa Cathedral sa dakbayan sa Sugbo ug Saint Joseph church sa dakbayan sa Mandaue.