Brgy. kapitan sa Tinubdan, Daanbantayan kalima gikiha diha sa Ombudsman

Gipasakaan og lima ka kasong kriminal ug administratiba sa buhatan sa Ombudsman-Visayas ang barangay kapitan sa Tinubdan, lungsod sa Daanbantayan nga si Juanito Ybañez.

Sila si Marciano Placencia ug Tereso Garbo ang nisang-at sa kiha pinaagi sa ilang abogado nga si Atty. Braulio Arriola Jr. batok kang Ybañez.

Kasong abuse of authority, harassment; illegal possession of firearms; malicious imputation of crimes and planting of evidence; ignorance of the law; libel ug grave oral defamation ang gipasaka na ngadto sa buhatan sa Ombudsman-Visayas.

Matud pa ni Placencia nga gipatawag siya ni Ybañez niadtong Oktobre 22 sa buntag sa barangay hall ug gipasanginlan nga siya usa ka rebelde ug nihatag og armas kang Garbo.

Gihimakak ni Placencia ang pamasangil dungan ang paghilak sa kahadlok gumikan sa giingong kadaghan na sa gipangpatay nga gikatahapang rebelde sa ilang lugar.

Sumala pa ni Placencia nga gipangutana usab siya ni Ybañez kun kinsa ang iyang kandidato sa pagka-mayor ug gipangitaan kun kinsa pa ang iyang mga kaubanan sa politika.

Si Garbo usab nipasangil nga paguniton siya og armas de fuego ni Ybañez ug ipaangkon nga gikan kang Placencia ang armas aron maoy pasakaan og kaso.

Nibalibad si Garbo sa hangyo ni Ybañez ug giingong gihulga kini sa kapitan nga maoy pasakaan og kasong illegal nga paghupot og armas.

Nagduda si Garbo nga may kalambigitan sa politika ang kaso sanglit kontra-partido ni Ybañez si Placencia.