Bana gipatay dihang milaban sa iyang asawa batok silingan

Patay ang usa ka hamtong nga lalaki nga igo lang miuwang sa panaglalis tali sa iyang asawa ug sa ilang silingan nga lalaki dihang siya ang gitigbas ug gidunggab sa naulahi sa miaging gabii sa lungsod sa Dalaguete.

Segun sa report sa kapolisan, ang suspek atol sa pagpanunggab nakainom sa ilimnong makahubog.

Ang gitigbas ug gidunggab mao si Dindo Jabagat, minyo, ug nagpuyo sa Sitio Panaguikan, Tapon Dalaguete.

Samtang ang midunggab nailhan nga si Gregorio Amanci, 27, ulitawo ug silingan sa biktima.

Nasayran usab nga ang paryente nga lalaki sa suspek mao usab ang gipasanginlang milugos sa anak sa biktima.

Matud pa nianang pasado alas 10 sa gabii nagyawyaw ang asawa sa biktima ug naatol nga nakadungog ang suspek ug gigukod ang babaye apan daling nakadagan paingon sa ilang balay ug nanirado sa pultahan.

Ang biktima, pagkahibalo, daling migawas ug mibadlong sa suspek.

"Wala na kapugong ang suspek kay hubog lagi, gitigbas daan ug pagkahuman gidunggab kadaghang higayon sa nagkadaiyan bahin sa kalawasan," asoy ni PO1 Oliver Ortega sa Banat News kagahapon.

Ang biktima gidala sa Julio Cardinal Rosales Memorial Hospital apan patay na kining naabot sa tambalanan.

Ang suspek giubanan ni Tapon Barangay kapitan Aurelio Aliñabon ug gisurender sa kapolisan.