Laing patrol car sa MPG nakabangga

Laing patrol car sa Mobile Patrol Group ang nadasmag na usab apan ning tungora di ang bag-ong Innova patrol cars kundili ang karaang mga sakyanan sa maong buhatan.

Ang MPG car 237 nga gimaneho sa usa ka sibilyang drayber nga si Sinfronio Aliño uban sa mga polis nga sila si PO2 Alejandro Laborte ug PO1 Japeth Malima padulong mitubag og alarma sa pagpangawat og kable sa PLDT diha sa dalan F. Cabahug sa barangay Mabolo.

Apan samtang sila nagdagan nga nagsiga ang blinkers ug nag-siren pag-abot sa may dalan San Jose dela Montaña sa maong barangay naigo niini ang luyong bahin sa usa ka armored car sa usa ka bangko atol sa pag-overtake unta niini sa maong armored car.

Ang pagkaigo nakaingon sa kadaut sa walang headlight sa maong patrol car apan luwas hinuon ang mga sakay niini.

Apan ang maong armored car wala mohunong aron pagsusi sa nakabangga kanila ug mipakusog og padagan palayo sa lugar samtang ang mga polis ug ang drayber napakyas sa pagkuha sa plate number sa maong armored car ingon man sa kung asang security agency kini nasakop.

Niadtong tulo ka semana ang milabay, nakontrobersyal nga gibawian ni Mayor Tomas Osmeña sa mga bag-ong Innova patrol cars ang MPG tungod sa kontrobersya nga pagkabangga niini sa usa ka taxi diha sa gawasanan sa usa ka motel.