30 ka tawo dakpan sa Kamagayan

Katluan ka mga babaye ug lalake nga gilangkuban sa tulo ka mga caretaker sa videokarera, mga babayeng nagbaligya og dungog ingon man ilang mga bugaw ang nangadakpan sa gihimong saturation drive sa Cebu City Police Office niadtong milabay'ng gabii diha sa barangay Camagayan.

Ang ronda gipanguluhan sa Vice Control Section inubanan sa mga sakop sa Theft and Robbery Section, Special Weapons and Tactics, Crime Suppression Unit ug Parian Police station.

Ang ronda miresulta sa pagkasikop sa 26 ka mga babaye ug lalake nga gidudahang nagbaligya sa ilang dungog ug mga bugaw lakip na ang mga modayo sa maong dapit nga gituuhang mogamit og drogas.

Samtang nangadakpan usab sila si Luche Damolo de Leon, 44, human makuhai diha sa iyang balay og upat ka mga videokarera, usa ka nubain ampule ug lima ka mga syringes.

Diha sa usa ka kubol-kubol, duha ka tawo ang naabtan sa sulod niini nga sila si Danilo Eboran Flores, 24, ug Marlon Sablas, 30, pulos mga taga barangay Suba nga nakuhaan og tagsa ka mga nubain ampules ug duha ka mga ginamit nga syringes, nakuha usab diha sa maong payag ang tulo ka mga videokarera machines.

Samtang laing gidakop mao si Julio Tulda, 53, nagpuyo sa maong dapit kinsa nakuhaan og usa ka ampule nga nubain ug duha ka syringes.

Tungod sa kadaghan migamit og bus ang kapolisan aron sa paghakot sa mga dinakpan ug nakumpiskang mga makina sa iligal nga sugal. Sumala pa sa kapolisan ang maong barangay maoy usa sa mga apektado kaayo sa pagkuyanap sa iligal nga drogas.

Matud pang Ylanan sa pakighinabi sa Banat News nga ang ilang operasyon kabahin kini sa proactive nga kampanya sa kapolisan batok sa mga iligal nga kalihukan.

"Mao ni part sa atong proactive campaign nga dili na nato sila huwaton nga mohimo pa og iligal nga buhat ato na silang unhan," asoy pang Ylanan.