Mga batan-on gipagawas sa mga sam-ang sa Talisay

Mga batan-on nga nagtapok sa sam-ang sa Poblacion, Talisay niadtong besperas sa kalag-kalag gipagawas sa mga polis tungod sa hangyo sa blue guard sa maong sam-ang paglikay nga dunay mahitabong kasamok.

Si PO1 Engie Piloto polis sa Talisay mibutyag kagahapon sa Banat News nga niadtong Oktubre 31 sa tungang gabii gidestino na sila sa mga sam-ang para pagmentenar sa kahapsay ug kalinaw tungod kay aduna nay daghang tawo ang nagbilar.

Matud ni Piloto nga giduol sila sa gwardiya sa nahisgutang sam-ang aron badlungon ang mga batan-on nga nagtapok sa sulod ug aron sila pagawason sa sam-ang.

Kahinumduman nga adunay mga nahitabong gubot sa siyudad kabahin sa frat war diin kasagarang nalambigit niini mga batan-on.

Si Police Superintendent Romeo Perigo hepe sa kapolisan sa Talisay mibutyag usab sa Banat News nga sukwahi sa ilang nakasabotan sa meeting sa traffic commission nga kagahapon pa unta ipangdestino ang mga polis diha sa mga sam-ang siyudad tungod kay bisperas palang sa kalag-kalag aduna nay daghang tawo diha sa mga sam-ang.

Matud sa hepe nga kung ang mga polis adunay makitang mga tawo ilabi na mga batan-on nga magpundo o magtapok-tapok sulod sa sam-ang nga walay mga tumong ila kining papaulion para malikayan ang kasamok.

Sukwahi usab sa gikasabotan sa meeting tali sa kapolisan ug traffic commission nga kagahapon pa unta sa alas 2:00 sa hapon siradohan ang mga karsada paingon sa sam-ang diha sa Poblacion, Sityo Maglasang sa Cansojong ug Tanke.

Ang karsada diha sa Poblacion gisiradohan niadto pang bisperas sa kalag-kalag pagka alas 12:00 sa gabii.

Si Perigo miklaro nga dili siya maoy nagpasirado og sayo sa maong karsada.

Kagahapon sa buntag si Perigo uban sa grupo sa kahapsay ug kalinaw pinangulohan ni Bise-mayor Aberdovey Belleza sa mga sam-ang para pag-monitor sa kalihukan.

Si Perigo midungag nga kutob lang karong adlawa (Huwebes) ang pagdestino sa mga polis diha sa mga sam-ang apan kung aduna pay daghang mga tawo bisan og lapas na sa maong adlaw dili mobiya ang mga polis sa maong mga lugar para siguridad.