Kagahapong adlawa, mipatawag og hiniusang tigum si bise Mayor Micheal Rama ngadto sa tanang mga sakop sa Oplan Kalag-Kalag.
Nasabutan sa maong tigum ang pagpakatap sa mga polis og mga tanod sa nagkalainlaing barangay aron motabang og bantay sa mga tawong managkot sa lubong sa ilang mga minahal sa kinabuhi diha sa lainlaing sementeryo.
Gawas niini, gipahibalo ni Rama nga dunay mga army nga sakop sa Central Command ang ipakatap atol sa maong okasyon.
Matud ni Rama nga niining higayona masukod ang katakus sa kapolisan pagpatunhay sa kahusay ug kalinaw sa dakbayan ilabina unya sa pagpahigayun sa Asean Summit nga naputos sa mga hulgang pagpamomba sa mga teroristang grupo.
Nunot niini, gipahibalo sa hepe sa Criminal Intelligence and Investigation Bureau (CIIB) Supt. Paul Labra ang publiko nga mokooperar ug mosabot tungod kay mas agresibo ang checkpoint og inspeksyon sama sa body search nga ipatuman nila ngadto sa mga tawong managkot sa lubong.
Samtang gibutyag usab ni Arnel Tancinco, executive officer sa Citom nga estriktong ipatuman ang no-parking sa 50 metros ang gilay-on gikan sa entrance sa mga sementeryo aron malikayan ang paghuot sa trapiko sa kalag kalag.
Ang chairman sa committee on police fire and penology Konsehal Procopio "Coping" Fernandez nga mitambung sa maong tigum mipahibalo usab sa estriktong pagpatuman sa tanang mga ordinansa sa syudad atol sa maong okasyon.
Kini naglakip sa pagpatuman sa pag ban sa mga tawong magdala og ilimnong makahubog diha sa sementeryo ug ang pagpamaligya sa mga sidewalk vendors.