Paggamit sa mga patrol cars monitoron na

Siyudad sa Sugbo mi implementar og bag-ong sistema sa pag-dispatsa sa mga sakyanan ilabi na kadtong gipanggamit sa kapolisan ug empleyado sa gobyerno.

Kini nunot sa insidente sa patrol car 004 nga nakabangga og taxi nga atbang sa usa ka motel dinhi sa dakbayan sa Sugbo.

Si konsehal Agusto "Jun" Pe gitahasan ni Mayor Osmeña sa pag-implimentar sa pagdispatsa sa mga sakyanan, miingon nga ang tanang patrol cars kinahanglan nga mauli sa motorpool human sa ilang trabaho ug makuha usab kini inig sugod sa ilang trabaho pagka-ugma.

"We will know immediately if bisan ma-scratch lang ang who is responsible. Kon mabangga, naa may insurance. Obviously if sige ka og kabangga unya the same driver, naay problema ang driver and we will immediately do the necessary adjustment," matud pa ni Pe

Kon kahinumduman ning sayong tuiga ang siyudad sa Sugbo mipalit og 30 ka units nga Toyota Innova ug 20 niini maoy gigamit sa kapolisan. Samtang gikatakdang moabot ang laing 10 para gihapon sa city hall.

Si konsehal Pe mihangyo ngadto sa publiko nga tabangan ang siyudad sa Sugbo sa pagmonitor sa mga sakyanan pinaagi sa pagtaho niini sa plate number ug pag-ila sa model sa maong sakyanan, ug asa kini nila nakita ug unsang orasa kini nila nakita.

Matud pa ni Pe unom lang ka units sa tamaraw FX ang nagdagan ubos sa Mobile Patrol group.

Tungod niini ang siyudad mibalhin sa lima ka units sa Isuzu Crosswinds gikan sa nagkalain-laing city hall offices ug gibalhin kini ngadto sa sakop sa kapolisan diin ang kapolisan naay 506,507,508,509, ug 512 nga gigamit karon sa Crime Suppression Unit (CSU).