Pabor si Tomas sa plano gitinguha diha sa Colon

Walay pagsupak si Mayor Tomas Osmeña sa laraw nga paghimong tourist zone sa pipila ka bahin sa Colon Area nga gitumong aron pagsulbad sa nagkagrabe nga suliran sa sidewalk vending ug aron mapalig-on ang turismo ug ekonomiya sa maong lugar.

Apan giklaro ni Osmeña nga dili himuong permanente ang pagpatuman niini aron dunay mahimong mga kausaban sa higayon nga dunay mga panahon nga dili unya kini epektibo.

Hinuon nagtuo si Osmeña nga kining maong plano nga giduso ni konsehal Helario Davide III pinaagi sa resolusyon niining gi-aprobahan sa konseho makahatag og dugang kadasig aron mosamot paglig-on ang pamatigayon sa Colon area nga maoy labing una og karaang klaye sa nasud.

Nasayran nga ang maong plano nakasugat og hugot nga pagsupak ilabina sa mga vendors nga sakop sa Cebu City United Vendors Association (CCUVA) nga nabalaka nga ma-apektuhan ang ilang panginabuhi-an sa higayun nga mapatuman ang maong tinguha.

Laing reklamo sa mga vendors mao ang kapakyas pagkonsulta sa konsehal sa wala pa unta kini mopasar og resolusyon alang ning maong katuyo-an.

Subay sa na-aprobahang resolusyon ni Davide gimanduan niini ang City Planning and Development Office ug ang City Traffic Operation Management (CITOM) pagsusi asang dapita ang ideklarar nga tourist zone.