Kiha vs city hall sa mga tunghaan gihangop ni Tomas

Gihangop ni Mayor Tomas Osmeña ang pagpasaka og kaso sa korte batok sa kagamhanan sa siyudad sa Sugbo sa walo ka mga tagdumala og pribadong tunghaan ug tambalanan dinhi sa dakbayan may labot sa planong pagkolekta og buhis sa nahisgotang mga institusyon.

May labot kini sa ordinansahon nga gipalabang ni Konsehal Jose Daluz III nga nagtinguha sa pagkolekta og buhis sa mga pribadong tunghaan ug tambalanan dinhi sa dakbayan gikan sa 2.5 porsyento gihimo nalang nga 3/4 sa uno prosyento.

Apan inay nga masuko medyo gisuportahan hinuon sa mayor ang lakang sa mga hingtungdang opisyal nga mipasaka og kaso sa korte ug mihangyo nga ipahunong ang planong pagkolekta og buhis sa dakbayan ngadto sa mga tunghaan og tambalanan nga naghatag usab og serbisyo sa publiko.

Apil sa mga petitioner ang Cebu Doctors University (CDU), Velez College, Cebu Institute of Technology (CIT) ug Southwestern University (SWU).

Gipasabot sa mayor nga igo lang nilang gihimo ang ilang gimbuhaton human mipadayag ang City Treasurers Office nga mahimong makolektahan og buhis ang mga nahisgotang institusyon bisan pa man og naghatag kini og serbisyo sa publiko.

Nasayran nga si Osmeña misugyot nga kolektahan og buhis ang nahisgotang mga institusyon apan kunhoran ang 2.5 porsyento nga nalatid niini sa balaod.