Gay bar gironda 13 ang 'dakpan

Trese ka mga lalaking giingong mga macho dancers ug ilang managers sa usa ka gay bar ang gidakop sa mga sakop sa Criminal Investigation and Detection Group 7 niadtong milabay'ng gabii diha sa barangay Banilad ning dakbayan.

Ang maong operasyon gilusad human makadawat og suwat-reklamo gikan kang Cebu Anti-Indecency Board (CAIB) chairman Dr. Rene Josef Bullecer kabahin sa malaw-ay nga kalihukan sa maong bar.

Ang operasyon gipanguluhan ni Chief Inspector Fermin Armendares III sa Criminal Investigation and Detection Team sa CIDG7.

Sumala pa ni Armendares base sa suwat-reklamo, dugay nang namatikdang nagpahigayon og malaw-ay'ng palabas ang maong bar nga sagad sa mga parokyano mga mahuyang ug mga matrona.

Niadtong bag-uhay lang, si Armendares nagkanayon nga nakadawat og impormasyon ang CAIB kabahin sa planong dunay "big night" nga mahitabo niadtong Oktubre 13 ngadto sa 14 maong mipadala ang CAIB og suwat diha sa CIDG.

Apan ang maong suwat ulahi nang naabot sa CIDG maong wala nila kahimoi og operasyon ang maong palabas.

Matud pang Armendares niadtong Lunes mipadala dayon siya og mga sakop sa maong bar aron panid-an ang kalihukan diha sa sulod diin mitumaw nga positibong magpasalida sila og hubo nga mga macho dancers.

Niadtong Biyernes sa gabii, ang grupo nila ni SPO3 Bernie Junco ug ubang mga operatiba sa CIDG mibalik sa lugar aron susihon ang operasyon sa maong bar ug positibo usab nga nakuhaan og litrato nga naghubo gyud og brief ang usa ka macho dancer atubangan sa mga polis.

Lakip sa nadakpan mao ang floor manager nga si Orlan Montero, Officer In-Charge nga si Jun Cervantes,35, ug mga macho dancers niining nag-edad pa 18 ngadto sa 28 anyos.

Matud pang Armendares base sa permit nga gipaskin sa sulod sa maong bar gipanag-iya kini sa usa ka Jomari Cuizon apan natino sa grupo sa CIDG nga si Dan Anton nga maoy tag-iya sa Club Nut sa Guadalupe nga gipasirad-an usab sa Cebu City Hall pila na ka bulan ang milabay mao usab ang tag-iya niini.