Wala kabayad og buhis hataga'g higayon — Daluz

Si Joey Daluz III ang council committee chairperson sa real property misumiter og resolusyon kalabot sa mga deliquent taxpayer.

Gusto ni Daluz nga tagaan og kahigayunan ang mga tag-iya nga makuha niini og balik ang ilang propriedad pinaagi sa installment nga pagbayad sa ilang buhis sulod sa redemption period.

"The city is not after the acquisition of these properties, but for the collection of taxes," matud pa ni Daluz

Matud pa ni Daluz si Tessie Camarillo ang city treasurer nga maoy misugyot ug mihatag og ideya ngadto sa mayor sa maong paagi sa pagbayad.

Apan si konsehal Edgardo Labella nga chairperson sa laws and ordinance misugyot ngadto kang Daluz nga makigsabot sa iyang komitiba sanglit nalambigit niini ang interes sa katawhan.

Midugang si Daluz ang mga tag-iya sa delinquent properties nga gi-subasta naay kahigayonan nga malukat ang ilang propriedad pinaagi sa installment nga walay patong.

Apan kung ang tag-iya dili makahimo og bayad niini sa kompleto nga kantidad sulod sa redemption period, ang nadeposito niini ibalik ngadto kanila nga walay interest apan ma-iya na sa siyudad sa Sugbo ang propriedad niini.