Gidunggab tungod sa mikroponong guba

Tag-iya sa videoke midunggab sa iyang silingan dihang gibunal ug giguba niini ang mikropono sa iyang videoke machine didto sa Quarry, barangay Looc, siyudad sa Danao sa milabay'ng hapon.

Si Arnel Alarin, 35 anyos, minyo, negosyante ug nagpuyo sa maong lugar maoy midunggab ni Filemon Parot, residente usab sa maong lugar.

Si PO3 Glenn Manulat sa Danao City Police Station miresponde sa maong alarma human usa ka kawani sa Danao District Hospital maoy mitawag sa ilang buhatan aron itaho ang maong insidente.

Sa pasiunang imbestigasyon pagka alas otso sa gabii sa milabay'ng Biyernes, ang biktima ug ang suspetsado naglalis mahitungod sa mikropono nga gipanag-iya ni Alarin.

Apan wala ka agwanta ang suspetsado mikuha kini og kutsilyo dayon duslak ngadto sa biktima nga gidali usab pagdala sa tambalanan.

Si Parot nakaangkon og samad dinunggaban sa iyang walang dughan dali nga gibalhin og ospital dinhi sa siyudad sa Sugbo ug ang suspetsado mitahan dayon kini kang PO2 Francis Villamor ug natanggong kini sa Danao City Jail.

Si PO3 Edgar Gomez,ang duty desk officer sa Danao City Police Station nga gikahinabi sa Banat News, miingon ang biktima hubog na daan dihang miadto sa tindahan sa suspetsado ug mihulog kini og P5 sa karaoke machine aron mokanta.

Apan naglagot kini tungod kay ang iyang P5 nga gihulog sa maong makina gikaon ug wala mo-display sa iyang kanta nga gipili, ug mihangyo kini ngadto sa suspetsado nga magpa-refund, apan nagdumili ang suspetsado nga mohatag maong misangpot sa ilang panaglalis.

Matud pa sa sakop sa kapolisan ang suspetsado migawas na kagahapon human kini nakig-areglo sa inahan sa biktima nga miadto gyud sa presinto aron kini makig-istorya sa maong suspetsado, ug misaad kini nga maoy mobayad sa tanang gastohonon niini hangtod nga maayo ang biktima sa iyang kondisyon.