Ang suspek nga nakulatahan sa mga tawo giilang si Welmer Pabillon,28, taga sitio Anapog, Lahug dihang ang biktimang tinun-an mipaak sa iyang walang kamot agi'g pagsupak.
Sa imbestigasyon sa Theft and Robbery Section, ang biktima uban sa iyang mga classmate naglakaw sa maong dapit aron mangadto sa balay sa ilang kauban aron maghimo sa ilang project.
Gikatahong kalit nga misunod ang suspek sa mga bata ug gilabni ang Sonny Ericson nga cellphone sa biktima, apan wala kini buhii sa bata ug nakiglayog kini kang Pabillon.
Ang suspek nga dako kaayo og lawas gipaak nalang sa biktima apan nadala gihapon ang cellphone sa naulahi dayong dagan pangadto sa direksyon sa St.Therese Parish.
Duha ka mga tawong naatol nga naagi diha sa gikahitaboan maoy nakakita sa pagkisi-kisi sa biktima hinungdan nga ilang gigukod ang suspek ug naabtan kini diha sa duol sa simbahan.
Ang duha giilang sila si Edward Ygot, 35, ug Edgar Rivera, 29, maoy nakabawi sa cellphone sa biktima nga nagbalor og P30,000.
Ang suspek gibalhog na sa Cebu City Police Office.
Samtang laing tulisan ang nadakpan human kini manulis gamit ang barbeque stick ngadto sa usa ka 16 anyos nga dalagita diha sa dalan V.Rama sa barangay Guadalupe niadtong milabay'ng adlaw.
Ang suspek giilang si John Elmido,22, taga dalan Modesta sa barangay Guadalupe.
Sumala pa ni PO1 Gerson Libatan notadong isnatser ang suspek sa lugar. Ang biktima kasamtangang naglakaw sa nahisgutang lugar dihang gisikitan sa suspek dayong tion og barbeque stick ug gikuha ang cellphone nga nagbalor og P6 mil.
Apan gidemalas ang suspek dihang daling nakaresponde ang mga tanod nga sila si Diomedes Ibonalo,Crisostomo Abella Jr. ug Leonardo Ragasajo Jr. nga gisumbungan sa biktima.
Hinungdan sa iyang pagkasikop ug pagkabalhog sa karsel sa maong presinto.