Inasal Festival karon

Gihangop ni Mayor Socrates Fernandez ang madasigong pagpangandam sa tanang Talisaynon alang sa Halad-Inasal Festival karong adlawa.

Matud pa sa mayor nga bisan gamay ra ang gigahin sa panudlanan sa kagamhanan ning maong tinuig nga kalihokan, apan nagtuo siya nga makabatog katagbawan ang tanan sa pagsaksi sa tanang kalingawan.

Sayo niini gibutyag ni konsehal Shirley Belleza nga iparada karong ala 1:00 sa hapon ang mga 80 kapin ka mga inasal.

Human niini adto kini ipahimutang sa ilang tagsa-tagsa ka stall nga giandam nang daan sa mga organizers diha sa Poblacion, Talisay City.

Apan lahi sa milabay'ng tuig, ang mga inasal karong adlawa dili libreng ipakaon sa mga mamiyesta, matud pa ni Belleza.

Midugang siya nga bisan ang prisyo sa maong mga inasal magpabilin gihapong tag P250 matag kilo.

Si Belleza kinsa maoy tsirman sa maong kalihokan nagkanayon nga gituohan niya ang dakong kalampusan niining maong gimbuhaton nga labing nakapainila sa Talisay sa natad sa industriya sa inasal nga baboy.

Si Mayor Fernandez sa iyang bahin mibutyag nga gumikan sa pagka-popular sa mga litson nga baboy sa Talisay daghang mga balik-bayan ang mosaksi niini aron tilawan ang kalamian sa inasal sa Talisay.

Hinuon gisandig ni Fernandez ngadto sa nagkalainlaing departamento nga maoy nagtinabangay sa pagpaningkamot nga magmalampuson ang maong proyekto.

Midugang ang mayor sa Talisay nga daan nang gipangandaman sa kagamhanan ang maong kalihokan sayo ning tuiga.

Kini maoy ikaduhang tuig sa pagpahigayon ning kalingawan uban sa mga inasal sa Talisay ug aron makapahuway ang mga trabahante ug estudyante sa ilang kahago karong adlawa, gideklarar sa mayor ang opisyal nga "holiday" ugma, Lunes, sa tibuok siyudad sa Talisay.