Suspek sa tulis nadakpan

Usa ka suspetsado sa pagpanulis sa duha ka empleyado sa cell shop sa Compostela nadakpan sa mga kapolisan dihang nagduwa kini ug mahjong sa ilang lugar sa Looc, Danao niadtong miaging Sabado sa gabii.

Positibo nga giila sa mga biktima sa pagpanulis ang suspetsado nga si Hortellano Quiros, 41, minyo ug kasamtangang nagpuyo sa Maslog, Danao nga mitulis sa duha ka biktima nga sila si Cherie Ann Gocotano, 19, ug sa iyang kauban didto sa sitio Tagkasan, Canamucan, Compostela.

Kahinumduman ang duha ka biktima misakay og motorsiklo nga gimaneho ni Joseph Vasquez padulong mouli sa dihang ang suspetsado mipahunong sa motorsiklo ug dayon tion sa mga biktima ug gikuha ang ilang cellular phone ug kwarta nga nagkantidad og P3,532.

Matud pa ni SPO2 Pedro Enriquez, gimanduan sa suspetsado ang duha ka biktima nga mokanaug ug magpabilin sa nahisgutan nga lugar.

Pinanguluhan ni SPO1 Enrique Los Baños mihimo kini og hot pursuit operation tibuok gabii ug matud pa ang drayber sa maong motorsiklo mibisita sa istasyon pagkabuntag sa Domingo.

Si Vasquez nga maoy drayber sa maong motorsiklo misaysay ngadto sa kapolisan kun diin kini niya gihatod ug giadto dayon kini sa mga sakop sa kapolisan inabagan sa mga miyembro sa citizen anti crime organization ila kini natultolan.

Ang suspetsado nadakpan sa kapolisan sa Looc Danao sa dihang nagduwa kini ug mahjong sa nahisgutang lugar, ug positibo kining giila sa mga biktima sa maong pagpanulis nga nahitabo dili pa lang dugay.

Natanggong na karon ang suspetsado sa Compostela Police Station ug gipasakaan na kini og kaso nga pagpanulis.