Joavan Fernandez: Testigo batok kang Joavan F. 'misibog'

Pamilyang Barinque nasagmuyo pagkahibawo nga miluwat og affidavit of desistance si Timoteo Aleo ang state witness sa kasong murder batok ni Joavan Fernandez.

Kagahapon sa hapon sa pakighinabi sa Banat News ni Alma Barinque, 41-anyos ug Rustty, 20, asawa ug anak sa namatay nga si Panfilo nagkanayon nga nakugang sila sa ilang nasayran pagluwat ni Aleo og pamahayag nga moatras sa kaso.

Gibutyag ni Alma ug Rustty nga si Aleo adunay gipirmahan nga motestigos kini pabor kanila sa pagpatay ni Panfilo niadtong Agosto 29 diha sa Sityo Maglasang Barangay Cansojong, Talisay.

Matud pa ni Rustty, mibutyag kanila si Aleo nga nakita niini ang kriminal tungod kay miduol kini sa iyang amahan ug gidul-it niini sa pagpusil ang biktima sanglit tupad sila sa biktima.

Apan ang pamilyang Barinque mitataw nga wala sila mawagtangi sa paglaom ug ipadayon gyud nila ang kasong murder batok ni Joavan.

Kahinumduman nga si Joavan maoy suspetsado sa pagpusil nilang Barinque, Aleo, Edmund Ong ug Carlos de la Calzada.

Sila si Ong ug de la Calzada miluwat na og affidavit of desistance pag-atras sa ilang mga pamahayag batok ni Joavan.

Si Aleo sa iyang affidavit of desistance nagkanayon kini nga ubos pa siya sa "state of shock" dihang miluwat siya og affidavit batok ni Joavan apan dihang normal na ang iyang kondisyon nahibaw-an na lang niya nga dili mao ang tawo nga iyang gitudlo.

Ug giawhag ni Aleo nga mabasura ang kasong iyang giduso batok ni Joavan.

Si Ong mipadayag sa iyang affidavit of desistance nga wala na siya'y planong ipadayon pa ang kasong frustrated murder batok ni Joavan.

Samtang si de la Calzada sa iyang affidavit of desistance gitataw niini nga dili si Joavan maoy mipusil kanila ni Ong diha sa usa ka burger stand diha sa Barangay, Dumlog.

Si Mayor Socrates Fernandez mitataw kagahapon nga ubos sa iyang kustodiya si Joavan ug boluntaryo niya kining itahan sa kapolisan sa siyudad kung molusot na ang warrant of arrest batok sa iyang anak.

Ang kasong murder batok ni Joavan naduso na sa korte sa milabay'ng semana ug gi-raffe pa kini kung kinsa nga huwes ang mohupot niini.

Si Fernandez mitataw sa iyang lig-on nga pagtuo nga wala malambigit ang iyang anak sa maong insidente.

Kahinumduman nga si Joavan positibo sa paraffin test apan alang sa mayor pagpakita kini nga limpyo ang konsensya sa iyang anak.

Si Police Superintendent Romeo Perigo sa iyang bahin nakugang usab sa pagluwat og affidavit of desistance sa mga biktima o wala pa siya makadawat og kopya sa maong mga affidavit.

Matud ni Perigo nga katungod sa mga biktima kung mopadayon ba kini sa kaso o dili.

Ang kapolisan sa siyudad padayon sa ilang kalihokan pagdakop sa giingong duha ka "John Does" apan ang dako nilang problema mao nga ang mga saksi nga diha gyud sa lugar nga nahitaboan nagdumili pagluwat og mga pamahayag sa kapolisan.