BIR raffle system angay usbon

Gitambagan sa konseho sa siyudad sa Sugbo ang kadagkuan sa Bureau of Internal Revenue (BIR) nga mangita og laing sistema og dili na gamiton ang palpak nga electronic raffle sa promosyon niini alang sa "Premyo sa Resibo Campaign".

Nabalaka si Konsehal Arsenio Pacana, tsirman sa committee on commerce trade and industry dinhi sa dakbayan nga maapektuhan ang kampanya sa BIR pagdasig sa publiko nga mangayo gyud og resibo sa mga produktong ilang paliton aron mosaka ang makolektang buhis sa gobyerno.

Wala malipay ang konsehal dihang nahibaw-an niini nga gibakwi sa BIR ug PAGCOR ang pangalan sa una na nilang gipublikar nga mananaug sa P1 ka milyon nga premyo sa "Premyo sa Resibo" campaign.

Tungod niini gisugyot sa konsehal ngadto sa BIR nga aron mas patas ug malikayan ang umaabot pang mga sayop tuyo niya nga ibalik ang karaang paagi sa pagpahigayon sa maong raffle nga magbutang og mga drop boxes sa nagkalain laing lugar ug tindahan aron anha ihulog ang resibo sa matag produkto nga gipalit sa kustomer.

Gipasabot sa konsehal nga gikinahanglan karon sa kadagkuan sa BIR nga makombinser ug balik ang pagsalig sa publiko ngadto sa maong ahensya ug madasig kini pagsunod sa ilang kampanya nga moporsige sa pagpangayo og resibo sa mga produktong paliton.

Gilusad kining maong kampanya sa BIR human mamatikdi niini nga dunay daghang sa mga kompaniya ang dili kaayo mohatag og resibo mga produktong paliton sa ilang mga kustomer.