Sumala pa nga ang mismong armalite sa polis maoy gigamit sa pagtiwas kanila.
Ang mga biktima giilang sila si SPO1 Richard Teves Sr. 46 anyos ug nagpuyo sa maong lugar samtang ang iyang anak nga si Richard Teves Jr, 14 anyos, usa ka tinun-an sa high school.
Sa pasiunang imbestigasyon ni SPO4 Christopher Cadiz sa Bais Police Station, nagkuyog ang duha sanglit kanunay'ng kuyogon sa polis ang anak tungod kay giisip na niya kining buddy sa trabaho ug niadtong tungura padulong sila pagsusi sa mga insidente sa pagpangawat og mga kable sa kuryente diha sa maong dapit.
Apan wala makamatikod ang duha sa usa ka kolor pulang motorsiklo nga kalit nga mipauwan kanila og bala diin unang naigo ang anak sa polis, hinungdan sa ilang pagkatumba.
Ang mga suspek daling mibalik sa agi ug gipunit ang armalite ni Teves ug maoy gigamit pagtiwas kanila. Ang mga suspek daling miikyas dala ang armas.
Si Carlos Lacuesta Jr, nga chief police sa Bais nagtuo nga may kalambigitan sa drogas ang motibo sa pagpatay tungod kay daghan na kining nakaaway ug nadakpan mahitungod niini.
Tulo ka kabhang sa .45 pistol ug tulo usab ka kabhang sa M16 rifle ang nakit-an sa crime scene lakip na ang kalibre .45 pistola ni Teves.
Si Teves nga 20 ka tuig na sa serbisyo nasakop sa Intelligence Section sa maong police station.