Crime prone areas ambakan sa mga tulisan - Gayotin

Mga tulisan ug isnatser sa dakbayan sagad dili mga residente sa mga dapit nga giila nga crime prone areas sumala pa ni Supt. Melvin Gayotin sa Cebu City Police Office.

Matud pang Gayotin ang mga tulisan diha ra molusad og pagpanulis sa maong dapit ug diha usab manganaog apan mosakay og laing sakyanan palayo sa maong lugar.

Base sa gihimong obserbasyon sa kapolisan sa mga insidente human sa pagpanulis, kadaghanan sa mga madakpang suspek atol sa hot-pursuit di mga residente sa gikahitaboan apan nasayran nga manakay sila dili layo sa ilang mga pinuy-anan.Pag-abot sa crime prone areas anha na sila modeklarar og tulis.

Ang mga dalan Mc Arthur boulevard (kutob sa North Reclamation Area), S. Osmeña, C. Padilla sa Duljo-Fatima kutob sa Mambaling, Highway Tagunol, sa Sitio Mahayahay sa barangay Mabolo, atubangang bahin sa Blessed Sacrament sa barangay Tejero, dalan Magallanes sa may Carbon area sa barangay Ermita maoy mga dapit karon nga sagad dunay mahitabong pagpanulis.

Samtang sa dalan Natalio Bacalso nga dunay mga insidente usab sa pagpanulis, may natala usab nga daghang insidente sa pagpanguot ilabi na sa mga terminal sa bus ug V-hire.

Niadtong Lunes sa hapon ang Criminal Investigation and Intelligence Branch, Vice Control Section ug Special Weapons And Tactics milusad og checkpoint sa dalan M.J. Cuenco diin naaresto ang upat ka pasaherong nagdala og mga kutsilyo ug armas.

Ang gidakop ang usa ka 17 anyos nga taga Tipolo, Mandaue, Cresencio Paquibot, 50, taga San Francisco, Camotes ug John Jen Sumer, 20, taga Tres Corones, Inolingan, Magallon sa Negros Occidental, ang tulo pulos nakuhaan og kutsilyo.

Samtang nakuhaan usab og usa ka kalibre 22 nga armas nga may upat ka buhing bala si Paterno Montebon, Jr. 32, taga Sumon, Tuburan.

Matud pang Gayotin base sa crime-clock sa CCPO, sagad mahitabo ang pagpanulis matag adlaw magsugod alas 4 sa hapon hangtud sa alas 10 sa gabii.