Standards og suspek giuyonan

Giuyonan kagahapon sa mga miyembro sa Cebu Citizens-Press Council (CCPC) ang gisugyot nga standards sa pag-ila ug pagpresentar og suspek sa krimen. Ang maong standards gitumong aron sa pagprotehir sa tawhanong katungod sa mga suspek.

Ang ikatulong quarterly en banc meeting sa CCPC nga gihimo didto sa Marcelo B. Fernan Cebu Press Center nga gimtabungan sa mga miyembro niini ug sa mga nagkalainlaing sektor sa katilingban, nagka-uyon nga ipasar ang maong standards isip tamdanan sa mga buhatan sa prensa pagmantala sa mga estorya ug hulagway paglikay nga malapas ang tawhanong katungod sa mga suspek sa krimen.

Ang maong standards nahimo pinaagi sa gitukod sa CCPC nga working committee nga gilangkuban nila ni Mayette Tabada sa University of the Philippines Cebu Visayas College, Joy Tumulak sa Superbalita, Jerry Tundag sa The Freeman.

Sa ikaduhang quarterly meeting, na-uyonan nga ipresentar una ang report sa committee ngadto sa mga hingtungdang ahensiya nga tigpatuman sa balaod, sama sa Philippine National Police ug National Bureau of Investigation, una pa kini sagupon isip standards nga sundon sa CCPCC.

Kini nga standards naglangkob sa pagmabinantayon pag-ila sa suspek sa krimen hangtod malapas na ang iyang tawhanong katungod, sama sa pagdili sa pagpresentar nila sa media atol sa press conference nga himuon sa mga tigpatuman sa balaod, ug imantala ilang ngalan ug hulagway bisan wala pa mapasaka ang kaso sa korte; pagsuta sa kamatuoran sa estorya pinaagi sa pagsusi niini pinaagi sa tulo ka kasaligang tinubdan; ug pagdili sa pagpresentar sa mga suspek nga magsul-ob og orange nga T-shirt nga mar markang "Prisoner".

Usa usab sa standards ang paglikay nga mahulagway ang usa ka suspetsado pinaagi sa iyang relihiyon, race o ethnic background; ug ang pagmabinantayon pagpublikar sa mga personal nga impormasyon nga walay direktang kalabutan sa kaso o wala pa masuta, ilabi na kun makadaot kini pag-ayo sa suspetsado.

Sila si Police Regional Office -7, Deputy Regional Director Sr. Supt. Ronald Roderos, uban ni NBI-7 Regional Director Edgardo Delemos, misaad nga ipakatap niya ang impormasyon kalabot sa maong standards aron masayran sa mga buhatan sa kapolisan.

Si Msgr. Achilles Dakay, media liaison officersa Artsidyosesis sa Sugbo, misugyot nga palapdan ang coverage sa standards aron maapil ang mga kaso sa pari tungod sa nangaging mga kaso nga daling nahinganlan sa mga newspaper bisan wala pa maabot sa korte ang kaso.

Ang CCPC nga gilangkuban sa mga editor, academe ug pribadong sektor natukod aron kahatagan og higayon ang katawhan nga may kareklamohan sa higayon nga malapas ilang katungod pinaagi sa publikasyon sa pamantalaan, telebisyon o radyo.