Walo ka polis nga wa sa drug test sa Talisay hayan parelibuhan

Walo ka polis sa Talisay kinsa wala makaapil sa gipahigayong drug test posibleng malagpot gikan sa dakbayan kun dili kini makasumiti og balidong rason.

Si Bise-Mayor Aberdovey Belleza kinsa tsirman sa Peace and Order Council mibutyag kagahapon sa Banat News nga kataposang adlaw kagahapon ang ilang gihatag nga higayon nga makapa-drug test ang maong mga polis og kung dili kini makapa-drugtest ug dili usab makahatag og balidong rason irekomendar sa Local Government Unit (LGU) nga malagpot kini gikan sa siyudad.

Ang Banat News napakyas og kuha og pamahayag ni Police Superintendent Romeo Perigo, hepe sa kapolisan sa siyudad tungod kay wala kini diha sa iyang buhatan sa oras niining pagbalita tungod adunay gitambongang tigom diha sa Cebu Provincial Police Office (CPPO).

Kahinumduman nga niadtong Martes ang Peace and Order Council mipasurpresa og pa -drug test sa mga polis sa siyudad tungod sa mga taho nga adunay mga polis sa Talisay ang migamit og ginadiling drugas.

Apan base sa resulta sa eksaminasyon sa 59 nga nakuhaan og drug test walay bisan usang positibo nga migamit og ginadiling drugas.

Lakip sa maong 59 nga naeksamin si Belleza, Jason Candia nga staff ni Belleza ug Police Superintendent Juanito Enguera, hepe sa Provincial Intelligence ang Investigation Branch (PIIB) kinsa maoy mi-supervised sa maong kalihokan.