Mananagat patay nang napalgan

Patay nang napalgan ang usa ka mananagat nga naglutaw sa kadagatan didto sa Sitio Guob, Lamintak Norte, Medellin niadtong Martes pasado alas 3 sa hapon.

Gituohan nga namatyan sa maong mananagat mao ang iyang pagkalumos sa dagat.

Ang mananagat giila nga si Bonifacio Pantaleon Tumabini, 48, ulitawo ug nagpuyo sa nahisgutang lugar.

Segun sa report nga midangat sa Cebu Provincial Police Office nga si Kapitan Fidereico Panabat sa Lamintak maoy nanawag sa kapolisan pinaagi sa telepono ug nagpahibalo nga dunay nakit-ang patay'ng lawas nga naglutaw sa dagat.

Si PO3 Pacquito Son uban ni Dr. Royland Momongan, municipal health officer sa maong lungsod nisusi sa patay'ng lawas sa biktima.

Apan nasuta ni Dr. Momongan nga ang gikamatyan sa biktima mao ang pagkalumos ug walay nakitang foul play ang kapolisan.

Matud pa sa report ang biktima migikan pasado alas 7 sa buntag sa ilang panimalay aron managat apan niabot na lang ang kaudtohon wala pa kini makabalik sa ilang panimalay hangtod nga napalgang naglutaw sa dagat ug patay na.