Kaso vs 2 'pari' na-dismiss na

Kasong pagpanghulga ug pagpangawat nga gipasaka batok sa duha ka pari sa Simbahan ni Teodorico, Inc., ug sa laing upat ka miyembro na-dismiss na sa City Prosecutors Office niadtong Hulyo 12 niining tuiga tungod sa kakuwa'g ebidensiya.

Kahinumduman nga si Padre Noel Ray Raganas ug Uldaricco Angcog, Mario Casane, Camilo Baricuatro, Lilia Baricuatro ug Loida Baricuatro gipasakaan og kasong grave threats ug qualified theft ni Elsa Suarez-Bagaman. Mi-testigos niini mao sila si Alejandrino Suarez, Delbert Bagaman ug Robert Noval.

Ang nahisgutang kaso naduso niadtong Hulyo 4 niining tuiga.

Ang unom gipasanginlang midala sa imahen sa ilang founder nga si Teoderico Melecio nga nagkantidad og P10 mil, typewriter P5 mil ug uban nga mga ekipo sa simbahan nga nagkantidad og P10 mil ug mibutyag sa panagna sa ilang Santo Papa nga mabuak ang Sugbo niadtong Marso 13 nga nakahatag og kahadlok sa uban nilang mga miyembro.

Base sa resolusyon nga giluwatan ni Prosecutor Rhoda Alcala-Bacatan nga ang unom nagbase lang sa mensahe sa ilang Santo Papa.