Ang gipusil patay mao si Narciso Alivio Damole, 38, minyo ug nagpuyo sa dalan Tres de Abril, ning dakbayan sa Sugbo ug branch manager sa Allied Bank nga nahimutang sa A.C. Cortes, Mandaue.
Base sa pasiunang imbestigasyon ni PO3 Dindo Montesclaros sa kapolisan sa Presinto 2 sa Mandaue City Police Office nasayran nga samtang nag-ilis og ligid si Damole sa iyang Toyota Vios nga adunay plaka nga GTJ 424, usa ka wala mailhing tawo miduol kaniya ug mitulis ug pagkahuman gipusil.
Matud pa ni Welmer Estellore, ang security guard sa Astec Motors nga nahimutang duol sa nahitabuan nga nakadungog siya og tulo ka sipang buto sa iyang paglingi usa ka tawo nga nag-motor ang mipahilayo sa maong dapit subay sa reclamation area padulong sa dakbayan sa Sugbo.
Pagresponde sa kapolisan sa Station 2 sa MCPO sa maong dapit napalgang patay si Damole nga naglunang sa iyang kaugalingong dugo ug aduna kini tulo ka mga samad pinusilan sa iyang likod, dughan ug sa pusod hinungdan sa hinanali niining kamatayon.
Atol sa pagresponde sa mga sakop sa Scene of the Crime Operation nakakuha kini og duha ka kabhang ug duha ka mga buhing bala sa kalibre .45 sa dapit nga nahitaboan.
Nasuta usab sa kapolisan nga wala na diha ang Omega nga relo, cellphone ug ang sulod sa pitaka niini hinungdan nga usa sa anggulo nga gisubay sa kapolisan sa Station 2 mao ang pagtulis sa biktima sa wala pa kini patya.
Sa pagpakighinabi sa Banat News sa mga kabanay sa biktima nasuta nga bag-o lang na-promote sa iyang pagka-branch manager si Damole diin nagbilin kini og upat ka anak nga ang kamaguwangan niini graduating sa high school sa Don Bosco Technical School.
Gihulagway si Damole sa iyang mga suod nga higala nga malipayon nga pagkatawo ug wala kini makadungog nga duna kini kaaway o hulga sa kinabuhi sa wala pa ang maong insidente.
Matud pa ni Sherly Damole, asawa sa biktima nga hustisya lamang sa gidangatan sa iyang bana ang iyang gipangayo ug mihangyo kini sa mga tawo nga nakasaksi sa maong hitabo nga modangop sa kapolisan aron kahatagan og kasulbaran ang kamatayon sa iyang bana.
Samtang si Sr. Supt. Eduardo Catabas mipadayag nga ilang himuon ang tanan nilang mahimo sa pagsulbad sa maong kaso gani iya nang gimanduan ang hepe sa station 2 sa MCPO nga mohimo og subsob nga imbestigasyon kalabot niini.