Surprise drug test sa Talisay police gihimo

Mga polis sa Talisay surpresang gipakuhaan og drug test kagahapon sa buntag sa Peace and Order Council nga pinangulohan ni Bise-Mayor Aberdovey Belleza aron masuta ang mga taho nga iyang nadawat nga adunay mga polis sa siyudad ang giingong mogamit og ginadiling drugas.

Gibutyag ni Belleza nga si Supt. Romeo Perigo, hepe sa kapolisan sa Talisay, dugay nang mihangyo kaniya nga ipasurpresa og drug test ang mga polis sa siyudad aron matataw ang nahisgutang mga taho nga ilang nadawat.

"Adunay mga istorya apan dili nato mahimong paminawon ang mga istorya kung wala tay mga ebidensiya," ni Belleza pa.

Gitataw ni Belleza nga tumong sa siyudad ang paglimpyo sa pangalan sa kapolisan sa Talisay hinungdan nga gipahigayon ang nahisgutang drug test.

Ang local government unit (LGU) maoy migasto sa gipahigayong drug test.

Matud ni Belleza nga irekomendar sa LGU nga ipatangtang sa listahan sa kapolisan sa Talisay ang masuta nga positibo sa drug test.

Si Supt. Juanito Enguera, hepe sa Provincial Intelligence and Investigation Branch (PIIB), maoy mi-supervise sa nahisgutang kalihukan.

Si Perigo mitataw nga aduna siya'y nadawat nga mensahe sa text nga adunay polis sa Talisay ang mogamit og ginadiling drugas hinungdan nga gipahigayon ang maong drug test aron mawala ang mga pagduda nga dunay mga polis nga mogamit og drugas ug aron usab malimpiyo ang ngalan sa kapolisan.

Ang magawas nga positibo sa drug test ipadala sa provincial headquarters aron ipa-ubos sa imbestigasyon ug pahamtangan og silot kun mapamatud-an gyud nga usa kini ka drug user.