Fratman napalgang may pinusilan sa ulo

Usa ka 21 anyos nga gidudahang sakop sa Tau Gamma fraternity ang gipusil patay kagahapon sa kaadlawon sa dalan Plaridel, Cambaro, dakbayan sa Mandaue.

Ang biktima mao si Rey Uy, ulitawo nga taga Sitio Kapusoan sa barangay Cambaro sa mao gihapong siyudad.

Si SPO1 Pedro Sucion sa Presinto 1 Centro Police Station nga maoy nangulo sa kapolisan sa pagtubag sa maong alarma.

Nasuta sa Banat News gikan kang SPO1 Sucion nga sakop sa maong fraternity ang biktima sa mga pakisusi usab nga ilang gihimo.

Dugang nga gikahinabi sa Banat News mao si PO2 Arthur Cuyos kinsa miingon nga naglakaw lang ang biktima sa maong dapit dihang kalit kining gipusil sa buko-buko.

Dugang pa ni Cuyos nga gidala unta ang biktima sa Mandaue City Hospital apan gideklarar kini sa mga doktor nga patay na kining nahidangat kanila.

Si PO2 Cuyos miingon nga nagpadayon pa ang ilang gihimong imbestigasyon alang sa pagsuta kon naglambigit ba sa fraternity rivalry ang maong pagpamusil. .