Usa nakumbikta, laing abswelto sa kaso may labot sa drogas

Usa ka tawo ang nakonbikto ug laing usa ang naabswelto sa kasong kalapasan sa Akta Republika 9165 kun Comprehensive Drugs Act Law.

Gihukman ni Regional Trial Court Judge Fortunato de Gracia sa branch 15 nga mabilanggo sulod sa walo ka tuig ug usa ka adlaw "prison mayor" ngadto sa 12 ka tuig ug usa ka adlaw 'reclusion temporal" ug pabayron og P300 mil nga multa si Ramonito Asignar.

Si Asignar, 33-anyos, residente sa Sityo Dita, Barangay Pulang Bato niining dakbayan nasikop atol sa gipahigayong pagpangronda sa grupo sa Criminal Intelligence and Investigation Branch sa Cebu City Police Office niadtong Abril 2003.

Dala sa maong mga polis atol sa ilang pagpangronda ang search warrant batok ni Asignar nga giluwatan ni Judge Francisco Seville sa Municipal Trial Court in Cities.

Nasakmit gikan ni Asignar ang walo ka paketeng shabu.

Ang maong mga pasangil gihimakak ni Asignar apan lig-on ang mga ebidensiya sa prosekusyon batok kaniya hinungdan nga nakonbikto kini.

Sa laing bahin giabswelto ni RTC Judge Raphael Yrastorza sa branch 14 sa kasong kalapasan sa Comprehensive Dangerous Drugs Act Law si Sally Marzon-Bohol nga gipasanginlang namaligya og shabu tungod sa kakuwang sa mga ebidensiya batok kaniya.

Niadtong Pebrero 2001 si Bohol ug ang uyab niining si Rodrigo Alinzug nasikop sa mga ahente sa National Bureau of Investigation (NBI) diha sulod sa usa ka motel niining dakbayan.

Si Teodoro Saavedra nagkanayon nga misulod siya sa kwarto sa maong motel nga giukopahan ni Bohol ug Alinzug para mopahigayon og buy-bust operation.

Si Bohol mipasangil nga gihulga siya ni Saavedra nga isumbong sa iyang bana sa iyang immoral nga buhat kung dili siya mopahuwam og kwarta.

Matud ni Bohol nga wala siya mohatag sa gipangayo ni Saavedra hinungdan nga gipasakaan siya og kaso.

Ang pamahayag sa depensa gihatagan og gibug-aton sa korte.

Si Yrastorza nagkanayon nga motibo sa giingong gipahigayong buy-bust operation mao ang pagpangilkil og kwarta sa akusado.