Mga tulisan balhin na'g operate sa mga ngilit-ngilit

Mga tulisan mibalhin na og operasyon diha sa mga ngilit nga dapit layo sa naandang dapit diin sila manulis sumala pa sa opisyal sa Cebu City Police Office.

Si Supt. Melvin Gayotin mitug-an sa mga tigbalita nga wala nila pasagdi ang mga dapit diin magkanunayan na ang mga tulisan apan gumikan usab sa mga prayoridad sa mga gipatrabaho sa mga polis maong malutsan sila sa mga suspek.

Gikonpirmar ni Gayotin nga gitawgan siya sa kadagkuan sa Police Regional Office 7 kabahin sa paghimo og paagi aron mapakgang ang susamang mga panghitabo.

"I ordered the station chiefs of Mambaling and Pardo to exert more efforts," asoy pang Gayotin.

Matud pa niya nga kanunayon na sa CCPO ang pagbutang og mga random checkpoints sa mga matag dapit aron pagsumpo niini.

Sukad niadtong Hulyo 2005 ngadto sa Hunyo ning tuiga duna nay 627 ka mga insidenteng nataho ngadto sa kapolisan , 451 niini pagpang-holdap diin 169 ra ang nadakpan apan 141 ra niini ang napasakaan og kaso ngadto sa korte.

Ang bulan sa Marso ning tuiga maoy dunay labing daghan og kasong pagpang-holdap nga dunay 52 ka kaso ug ang bulan sa Mayo dunay 21 ka pagpang-holdap ug maoy labing kinagamyan.

Si Gayotin nagkanayon nga kun itandi sa milabay'ng katuigan mas daghan ang mga kaso sa pagpanulis nga sagad mahitabo diha sa dalan N. Bacalso, Colon, Mc Arthur Boulevard, M.C. Briones ug Mango Avenue.

Matud pang Gayotin nga posibleng pagkalambigit sa drogas sa mga suspek maoy nagtukmod kanila sa pagpasakit sa ilang mga biktima.

Duna nay upat ka insidente nga gipusil o ba kaha gidunggab sa mga tulisan ang ilang biktima ning tuiga, ang labing ulahi nahitabo niadtong Miyerkules sa gabii diha sa Highway Tagunol, Cogon-Pardo diin usa ka tinun-ang babaye ang gipatay (basaha sa pahina 2).

Nanawagan ang opisyal ngadto sa publiko sa pag-text sa kadudahang mga silingan ngadto sa kapolisan aron kini masusi, samtang ang mga biktima sa pagpanulis giawhag sa dili pagsukol og paghuna-huna sa ilang kinabuhi kung dili kini paigong ibaylo sa ilang butang ug ingon man ang pagtimaan sa dagway sa suspek.