Usa sa gitumbok ni Mayor Tomas Osmeña mao ang problema sa drainage diha sa Mabolo nga kun atimanon ang suliran sa drainage sa Sindulan mobalhin ang problema sa baha sa kasikbit nga lugar.
Niadtong miaging adlaw dul-an sa 50 ka mga pamilya nga molupyo sa Sindulan, Mabolo nagpanon nga midangop sa City Hall aron ireklamo ang suliran sa baha sa ilang lugar tungod sa problemadong drainage system.
Ang usa ka establisamento nga nahimutang sa maong dapit maoy ilang gibasol nga nakatampo sa masinating mga pagbaha panahon sa ting-ulan gumikan sa konkretong koral niining gitukod hinungdan nga adto sa mga ordinaryong pinuy-anan sa Sindulan, Mabolo mopaingon ang baha.
Daling gimanduan sa mayor si City Attorney Rodolfo Golez sa paghimo og pakisusi sa posibleng kalapasan sa Building Code sa maong gireklamo nga establisamento nga nakamugna og pagka bara sa drainage ang pader niining gitukod.
Niadtong milabay'ng duha ka semana unom ka sakop sa pamilyang Balagapo ang nalumos ug namatay sa Sindulan,Mabolo dihang natumpag ang paril sa kusog nga baha ug mitabon sa ilang gi-abangang apartment.