Wala na matabang sa tambalanan ang biktimang sila si Pilar Hernandez, 61, taga San Antonio Village sa barangay Banilad ning dakbayan ug ang sekretarya niining si Wevina Pancho, 55, nga taga San Jose, Tisa ning dakbayan.
Gisusi pa sa Homicide Section ug sa Theft and Robbery Section kung si kinsa ang suspek ug kung pila ka buok ang nihimo sa krimen sanglit gihulagway nga "planado" kaayo ang tulisan.
Wala pa matino kung pila ang salaping nadala sa maong tulisan apan gituohang P500,000 ngadto sa P1 milyon ang nadala lakip na usab ang listahan sa tanang mga polis nga utangan.
Si Hernandez maoy nanag-iya sa maong lending firm ug sagad sa iyang kliyente sakop sa kapolisan.
Duha ka polis nga sila si PO2 Jessie Yramis sa San Nicolas police station ug PO2 Jaime Abellana nga nadestino sa Talisay City police station maoy nakadiskubre sa gidangatan sa mga biktima.
Matud pang SPO2 Zenaido Pastorfide sa Banat News nga miabot ang duha ka polis aron mangutang apan tungod sa paskin nga gibutang diha sa gawas sa pultahan wala dayon sila mosulod.
"Please comeback on Monday, We are on inventory. Thanks, Management" sumala pa sa paskin nga gisuwat sa pentel pen sa usa ka puti nga cardboard.
Apan si Yramis ug Abellana gikatahong nagkauyon nga 'mohangyo' lang gyud kang Hernandez maong gilili ni Yramis ang 'one way' nga bildo ug iyang nakit-an si Hernandez nga naglingkod sa lingkuranan niini nga nagtakilid samtang si Pancho naglihok nga daw dunay giukay nga dokumento diha sa drawer sa lamesa.
Nianang tungura mitingog ang automatic door lock hinungdan nga misulod si Yramis sa pagtuong pasudlon na sila apan nakugang nalang dihang nakit-ang nagbuy-od na si Pancho ug si Hernandez wala na maglihok.
Ang duha gidala sa Velez hospital diin parehong nabugtoan sa ilang ginhawa pila ka oras tungod sa grabeng mga samad nga nahiaguman.
Lima ka basiyo sa 9mm nga kalibre, usa ka buhing bala, usa ka slug ug usa ka metallic fragment ang nakit-an diha sa crime scene.
Sumala pa sa driver sa biktima nga si Alfonso Evangelista, 49, pag-abot nila gikan sa Carbon duna nay nagpaabot nga usa ka lalaking iyang gidudahang polis diha sa gawas ug sa ilang pagsulod mikuyog usab kini.
Dangtan pila ka gutlo gisugo siya ni Hernandez nga mopalit og pan, sa iyang pagbalik naa pa gihapon ang maong polis diha sa sulod hangtud nga siya mipauli na sa balay sa iyang agalon.
Diha nalang niya mahibaw-i pag-abot sa balay nga dunay nahitabo sa iyang agalon maong gipabalik siya sa buhatan.