Nanulis sa batan-on gidakop sa mga estambay

Usa ka tawo nga nanulis sa batan-ong lalaki nga nagpaabot og PUJ nadakpan sa mga estambay sa dalan M.C. Briones sa Guizo, dakbayan sa Mandaue niadtong miaging gabii.

Ang nadakpan mao si Alfie Marie, 23, ulitawo nga taga dalan Tres Rosas sa barangay Alang-Alang, Mandaue.

Ang biktima nga gitulis mao si Jupiter Pareja, 21, ulitawo nga nagpuyo duol sa Eversly Child Sanitarium sa Jagobiao sa maong dakbayan.

Nadakpan ang suspetsado nila ni Dave Dabon ug Raymond Malinao, nga mga lumolupyo sa Santo Niño, Guizo sa maong dakbayan.

Maoy nasayran ni PO2 Stephane Amamag-id sa Cetro Police Station nga nagpaabot og PUJ ang biktima sa maong lugar.

Kalit kining giduol sa suspetsado ug gitionan og kutsilyo dungan ang pagpahibalong tulis.

Gikuha niini ang cellphone nga 1100 sa biktima apan nasigpatan kini sa duha ka estambay sa maong dapit nga maoy hinungdan nga gidakop ug gitahan sa kapolisan nga maoy hinungdan sa pagkabalhog niini sa bilanggoan.