Anak sa mayor gikasuhan

Giduso na kagahapon sa korte ang kasong frustrated murder ug murder batok ni Joavan Fernandez apan temporaryo kining gawasnon karon tungod kay mibayad dayon kini og piyansa nga P200 mil.

Sa pakisusi sa Banat News sa Talisay City Prosecutor's Office kagahapon sa hapon si Timoteo Aleo ang mipasaka sa kasong frustrated murder ug si Alma Barinque gikatakdang mopasaka og kasong murder batok ni Joavan.

Si Talisay Public Information Officer (PIO) Ike Durano mibutyag kagahapon sa Banat News nga aduna nay miduso og reklamo batok ni Joavan kagahapon sa hapon diha sa Fiscal's office sa Talisay og kagahapon sa hapon usab giduso dayon ang kaso sa korte.

Matud ni Durano nga mibayad og piyansa si Joavan para sa temporaryo niining kagawasan.

Si Durano mitataw usab nga wala pa silay nakuhang resulta sa paraffin test ug ila pa kining gi-follow-up.

Kahinumduman nga si Joavan usa sa suspek sa pagpamusil sa usa ka drayber sa PUJ ug sa kondoktor niini niadtong Martes sa kadlawon diha sa dalan Maglasang. Barangay Cansojong Talisay.

Patay diha-diha ang biktimang si Paulino Barinque ug kritikal ang kahimtang sa iyang kondoktor nga si Timoteo Luyan Dico.

Human sa maong pagpamusil ang duha ka suspetsado mipasutoy sa gisakyan niining revo nga kolor abo og pag-abot diha sa Barangay Dumlog og namusil na usab kinsa ang mga biktima sila si Edmund Ong nga nakaangkon og samad pinusilan sa tangkugo ug Carlos dela Calzada nakaangkon usab og samad pinusilan sa tiyan ug tuong paa.

Si Mayor Socrates Fernandez mibutyag niadtong milabay'ng adlaw sa mga tigbalita nga gitugyan niya ang iyang anak ni Police Superintendent Romeo Perigo hepe sa kapolisan sa Talisay para malimpiyo ang pangalan niini sa mga pasangil nga aduna kini kalambigitan sa maong insidente.