Terorista di kasamok sa summit - Lasangue

Kandado-sirado na ang mga pultahan nga magsilbing kalutsan sa mga teroristang buot mosamok sa Asean summit dinhi sa Cebu.

Mao kini pasalig ni Col. Oscar Lasangue, sa Civil Relations Group (CRG) sa Armadong Puwersa sa Pilipinas (AFP) nga nagbase sa Lahug, Cebu City.

Matud pa ni Lasangue nga pinaagi sa maayong panaghiusa sa mga opisyal sa barangay, kapolisan ug militar, dili na makahuygo ang mga terorista pagmugnag binuang unya sa dakong panagtagbo sa mga lider sa Association of Southeast Asian Nations (Asean) dinhi sa Sugbo sa umaabot nga Disyembre.

Apan labaw sa tanan ang maayong koordinasyon sa kagamhanan sa lalawigan ngadto sa mga sundawo ug polis, maoy naghatag og hait nga ngipon kanilang tigpatuman sa kalinaw karong umaabot nga summit, matud pa ni Lasangue.

Nasayran nga ang mga gaway sa mga terorista dinhi sa Sugbo o sa tibuok nasud nga mao ang New Peoples Army (NPA) nag-anam nag bahag ang ikog, matud pa sa maong opisyal sa CRG.

Kini tungod kay matag lihok nila sa kabukiran ug kapatagan kanunay silang gipanup-an sa mga barangay intelligence network (BIN) nga kaabag sa lokal nga kagamhanan.

Matud pa ni Lasangue nga hugot kaayo ang pagkakandado sa posible nilang kaagian aron momugnag kasamok, hinungdan nga mihoyhoy na ang abaga sa mga rebelde karon, matud pa niya.

Bahin sa mga teroristang langyaw, si Lasangue nagkanayon nga ang puwersa militar sa kahanginan, kadagatan ug sa kayutaan, walay puas sa pagpangispiya sa matag tawo nga kadudahang terorista nga mointra dinhi sa teritoryo sa Kabisay-an.

Matud pa niya nga anaa sa militar ang dakong tahas sa pagbantay sa mga tugpahanan sa eroplano, dunggoanan sa mga barko ug bisan pa ang mga terminal sa mga sakyanan sa kayutaan ning nagsingabot nga Asean Summit.